A concelleira de Cultura do Concello de Lugo, Maite Ferreiro, anunciou a instalación dun ‘punto violeta’ na Praza Maior durante as festas do San Froilán.
O punto, que se articulará en colaboración con Cruz Vermella, busca “contribuír a previr situacións de acoso ou violencia machista e atender as posibles vítimas”.
Todas as persoas que o desexen poderán achegarse a recibir información ou comunicar calquera tipo de situación de acoso sexual. Ademais, repartiranse folletos informativos. O punto habilitado polo Goberno de Lugo situarase no fondo da praza Maior, do mesmo xeito que nos últimos anos, e prestará atención os días 4, 6, 7, 8 e 11 de outubro entre as 21,00 e as 02,00 horas.
A edil lembrou que a violencia machista “pode mostrarse de distintas maneiras segundo o ámbito e o espazo”, aínda que festas como o San Froilán “son especialmente sensibles a este tipo de situacións”. “Debemos concienciar e sensibilizar para modificar e erradicar actitudes e comportamentos sexistas nos espazos de lecer, creando así espazos libres de agresións onde todos e todas podamos gozar das festas libremente e con tranquilidade”, sinalou a concelleira.
