A Xunta de Galicia validou o Plan Xeral de Ordenación Municipal (PXOM) da cidade de Lugo, aínda que vinculando a súa aprobación definitiva a un informe da Confederación Hidrográfica Miño-Sil.

Adiantouno este mércores a conselleira de Medio Ambiente, Ángeles Vázquez. “Despois de máis dunha década esperando, os lucenses e tamén a Xunta, a aprobación dese 5% que afecta a 21 das 54 parroquias que ten o Concello e despois de trasladarnos a documentación, hoxe mesmo a directora xeral de Ordenación do Territorio asinou o informe que enviará, tamén, hoxe ao Concello de Lugo”, puntualizou.

Trátase, apunta, dun informe favorable porque a Xunta “non quere obstaculizar a aprobación definitiva”, pero matiza que estará condicionado polo cumprimento de todo aquilo que esixe a Confederación Hidrográfica Miño-Sil.

“Na documentación que nos achegou o Concello de Lugo non está integramente axustado, polo que xa deixamos nas súas mans a aprobación definitiva condicionada a que eses cursos fluviais, como o informe da confederación, se axuste ao 100%. Esperamos que non se demore moito”, desexou.

Foi nun pleno no mes de xuño cando saía adiante ese 5% que faltaba por cubrir do Plan Xeral, co respaldo do PP. O BNG, socio do PSOE no goberno municipal, votaba en contra.