A candidata polo PP á Alcadía de Lugo, Elena Candia, explica a militantes a folla de ruta a seguir na carreira ás municipais, baixo a lema ‘Obxectivo Lugo’. Asegura que “Lugo quere cambiar” e que a veciñanza “está cansa de 25 anos de bipartidismo na cidade”.
Tras reunirse con afiliados e colaboradores, Candia di estar “nun momento ilusionante” e por iso quere convidar “a todos a formar parte deste proxecto”. No primeiro encontro entre populares, Candia deu as primeiras pinceladas do que será a súa liña a seguir durante os próximos meses para lograr o obxectivo de converterse na próxima alcaldesa da cidade lucense.
Para establecer uns puntos claves dentro da súa campaña, Candia di que a opinión do partido e de fóra serán dous eixos fundamentais. Explica que, “ademais de crear espazos de debate na sede, haberá moito traballo a pé de rúa porque para acertar hai que primeiro escoitar”.
“Deseñamos unha folla de ruta moi intensa para implicar e dar unha participación real a todos os que queiran facer as súas peticións, suxestións, críticas ou ideas innovadoras”, anunciou emocionada ante os seus compañeiros de partido.
Defende que desde a formación azul “se entende a política como un traballo en equipo, escapando dos protagonismos e dos sectarismos doutros partidos”. A candidata lucense polo PP deixou tempo na súa intervención para agradecer as mostras de afecto e de apoio recibidas nos últimos días. Afirma que “intensificará a participación e protagonismo dos afiliados e colaboradores” co fin de consolidar e ampliar a estrutura do partido.
Candia finalizaba a súa presentación cos afiliados, celebrada na sede do PP, afirmando que está “preparada” e “orgullosa de poder representar os lucenses nas próximas eleccións”, pois asume “este reto apaixonante con responsabilidade, compromiso e humildade”.
