O alcalde de Pedrafita, José Luís Raposo, móstrase “satisfeito” coa alternativa ao viaduto do Castro, na A-6, que reduce en 6,6 quilómetros o traxecto e que se puxo en marcha o mércores. Raposo valorou de forma “positiva” esta alternativa que “é un adianto moi importante porque, á fin e ao cabo, son seis quilómetros menos e parece que se nota que hai tráfico máis continuamente pero máis fluído”.
“Coas retencións que había neses seis quilómetros, logo metíanse na Nacional (N-6) e ás veces víase un embotellamento e tardábase un cacho”, expuxo.
O alcalde de Pedrafita apunta que “algunha empresa de camións se queixou e dicían que o problema gordo a este tramo de autovía podíase solucionar con facilidade, e é o que se fixo e funciónase bastante mellor”.
José Luís Raposo subliñou que “agora o que cabe agardar” é que se faga “o outro acceso desde a rotonda da entrada ata o túnel e por aí irá un carril”.
Neste sentido, avanzou que “de inmediato se van pór (o Goberno central) coa ligazón do carril da rotonda para a entrada do túnel e así se desviarán por aí os que veñen da Coruña a Madrid e, deste xeito, evitarase que pase unha cantidade importante de tráfico polo concello“.
O desvío, segundo o Ministerio de Transportes, prodúcese entre os puntos quilométricos 428 ao 432 da autovía A-6.
