A Policía Local de Lugo interceptou un condutor menor de idade, de 17 anos, que carece de permiso de conducir, ao volante dun vehículo que, ademais, non pasara a ITV en prazo.
Segundo informou a Policía Local, sobre as 16,15 horas do pasado 2 de maio unha patrulla da Unidade Territorial de Policía de Barrio detectou a “circulación irregular” dun vehículo pola rúa San Roque.
Ao darlle o alto, os axentes comprobaron que era conducido por un mozo menor de idade, de 17 anos, e que, ademais, o vehículo “non pasara a ITV no prazo debido”.
Os axentes municipais contactaron cos pais do menor e a Unidade de Atestados instruíu dilixencias por un delito contra a seguridade viaria ao carecer de autorización administrativa para conducir por non obtela nunca. Ademais, o vehículo foi inmobilizado.
