A sección segunda da Audiencia Provincial de Lugo condenou a dous anos de cárcere a unha muller por estafar, de forma continuada, a unha amiga, á que deberá indemnizar con 9.519 euros.
Segundo informou o TSXG, o tribunal considera probado na sentenza que a acusada, quen tivera unha relación laboral coa exparella da vítima, enganou á muller “propóndolle contratar de forma conxunta os servizos dunha avogada para así demandar conxuntamente o seu ex-xefe e reclamarlle unhas cantidades que debía a ambas”.
“A procesada, a pesar de ser plenamente coñecedora do seu engano, finxiu, entre agosto de 2016 e abril de 2017, manter contacto profesional cunha letrada e, guiada por un ánimo de lucro, esixía de forma continua á denunciante provisión de fondos, simulando que eran pagos para a asistencia xurídica que estaba a prestar a avogada”, relata o tribunal na resolución, na que destaca que, durante este tempo, a afectada realizou 25 transferencias aos números de conta que a condenada lle facilitaba.
Os maxistrados consideran á sospeitosa autora dun delito continuado de estafa porque entenden que houbo “un engano suficiente por parte da acusada”, quen se aproveitou “da situación de debilidade emocional na que se atopaba a vítima, por mor da súa ruptura sentimental”.
Ademais, subliñan que “fixo nacer na vítima a idea de reclamarlle o diñeiro que desembolsara a conta da súa exparella”, polo que logrou que lle fixese diversos ingresos, “a pesar das dificultades económicas nas que a denunciante se atopaba, que chegou a pedir o diñeiro a familiares e amizades, feito do cal era coñecedora a propia acusada, que, aínda así, persistiu na súa acción”.
