Os contaxios por covid-19 seguen en aumento en Galicia ata alcanzar os 1.725 en 24 horas — 242 máis que a xornada anterior– con 15.743 infeccións activas — 945 máis–. A taxa de positividade das probas realizadas sitúase, mentres, no 28,8%. Así se recolle nos datos da Consellería de Sanidade con rexistros ata as 18,00 horas do martes e recollidos por Europa Press.

De acordo cos mesmos, as hospitalizacións sitúanse en 695 –dúas menos–, delas 672 en unidades convencionais e 23 en UCI. Excepto na da Coruña-Cee, Vigo e Ourense, que aumentan, e na de Pontevedra, que se manteñen, no resto descenden. En concreto na da Coruña-Cee, hai 172 ingresados, dez máis respecto dos datos do luns, con 170 ingresados en planta e dúas en UCI.  Lugo-A Mariña-Monforte sitúase á cola de Galicia con 72, 63 deles en unidades convencionais e nove en UCI. A área lucense é así tamén a máis afectada nas súas unidades de coidados intensivos.

SOBEN OS CASOS ACTIVOS

Os casos activos ascenderon na última xornada ata os 15.743, 945 máis que os rexistrados o martes. Deles, 3.130 corresponden á da Coruña; 1.178 á de Ferrol; 2.341 á de Lugo; 2.173 á de Ourense; 1.782 á de Pontevedra; 2.592 á de Santiago e 2.532 á de Vigo. O ascenso no número de contaxiados é xeneralizado en todas as áreas sanitarias, con 318 contaxiados máis na da Coruña; 270 na de Santiago; 283 na de Vigo; 182 na de Pontevedra; 258 na de Ourense, 296 na de Lugo e 117 máis na de Ferrol.

Por outra banda, segundo o último informe actualizado polo Ministerio de Sanidad este martes, adaptado ao novo sistema de vixilancia da covid-19 centrado en poboación vulnerable, a incidencia acumulada a 14 días en Galicia en maiores de 60 anos ascende a 1.183,74 casos por 100.000 habitantes, mentres que a media nacional se sitúa en 608,16. A taxa de positividade –número de PCR positivas por cada 100 realizadas– aumenta en relación ao luns ata situarse nun 28,8%.