O concelleiro por Galicia Sempre no municipio de Meira, Enrique Castro, acordou a súa integración no grupo municipal do PP, que contará agora con dous edís no concello gobernado en solitario polo Partido Socialista con seis dun total de nove asentos na corporación.
O acordo, do que informou este luns a dirección provincial dos populares lugueses, tamén inclúe a adscipción como afiliado de Enrique Castro, cabeza de lista nas eleccións municipais de 2019 pola candidatura independente ligada ao proxecto político fundado polo exvicepresidente da Deputación de Lugo e alcalde de Becerreá, Manuel Martínez.
A presidenta provincial do PP de Lugo, Elena Candia, deu a benvida ao novo membro da organización, un movemento que cualificou como “unha noticia moi positiva” que permite “seguir ensanchando o partido e recuperando persoas que, no seu día, xa formaban parte da familia do PP”.
Pola súa banda, Enrique Castro xustificou o paso dado como un acto de “responsabilidade” coa veciñanza e comprometeuse a traballar para “finalizar co desgoberno” que, di, representa o mandato dos socialistas.
