Axentes da Policía Nacional adscritos á Comisaría Provincial de Lugo encargados da investigación dos delitos relacionados coa saúde pública detiveron a un home de 39 anos con antecedentes por un delito de tráfico de drogas, tras o que se considera desarticulado un punto de venda de sustancias estupefacientes.
Así o informou a Policía Nacional, que indicou que despois de ter información a través do delegado de Participación Cidadá da Comisaría Provincial, “dunha trasfega de toxicómanos, nada habitual en certas zonas do barrio da Milagrosa”, a Policía Xudicial puxo en marcha unha investigación para determinar a verosimilitude das informacións, así como a posibilidade de que se cometese un delito contra a saúde pública.
Deste xeito, tras vixilancias e diferentes comprobacións, os investigadores determinaron que ese home, “moi coñecido polos investigadores”, destaca a Policía, fora detido no últimos tres anos ata en cinco ocasións con motivo da mesma “tipoloxía delituosa”, abunda.
Por iso, o pasado martes nunha das intervencións dos axentes que levan a investigación observaron que se realizaban vendas de droga na vía pública, polo que procederon á súa inmediata intervención e detención.
