A Policía Local de Lugo propuxo para sanción de ata 10.400 euros a un individuo por desobediencia aos axentes que o querían identificar, ao que se negou, como responsable dos ruídos nunha vivenda denunciados por veciños. Segundo informou a Policía Local, sobre as 4,10 horas unha patrulla do Grupo Operativo Nocturno da Policía Local de Lugo foi enviada a un edificio da rúa Lor porque veciños se queixaban do ruído procedente dunha vivenda que lles imposibilitaba o descanso.

Os axentes desprazados comprobaron que se escoitaban ruídos de música en ton alto e de actividade humana, polo que chamaron repetidamente á porta da vivenda de onde procedían as molestias, xa que inicialmente ninguén abría.

Finalmente lograron que abrise o responsable, ao que se lle requiriu que cesase de inmediato a actividade e se lle solicitou a súa documentación persoal para a acta de denuncia, ao que se negou, polo que foi advertido da súa obrigación e das consecuencias “graves” que iso supoñen.

A Policía Local tramitou acta de denuncia por infracción á ordenanza de protección ambiental e dúas máis por infraccións á Lei de Seguridade Cidadá. A primeira, puntualizan fontes policiais, por desobediencia aos axentes da autoridade, proposto para sanción de ata 10.400 euros, e a segunda por falta de respecto aos axentes, con proposta de multa de ata 600 euros.

EQUIPO DE MÚSICA

Por outra banda, no marco do dispositivo de inspección da hostalaría nocturna, unha patrulla local realizou acta de denuncia por infracción á normativa reguladora de espectáculos públicos e actividades recreativas ao detectar un establecemento na rúa Xosé Castiñeira que non pode ter equipo reprodutor de música con único instalado.

As mesmas fontes sinalaron que tiña instalado, sen contar con autorización expresa administrativa, un computador portátil conectado a un amplificador, situados nun pequeno almacén detrás da barra, “emitindo a través duns altofalantes situados nas esquinas do local”, conclúe a Policía Local.