A Policía Local de Lugo interceptou dúas condutoras que foron sancionada con mil euros de multa e a retirada de seis puntos do carné tras obter alcoholemia positiva despois de senllos accidentes de tráfico. Segundo informou a Policía Local, por unha banda ás 2,25 horas do pasado 6 de marzo un equipo de Atestados da Policía Local trasladouse á rúa Campos Novos por un accidente de tráfico.

Ao chegar, os axentes comprobaron que un vehículo chocara contra outro estacionado e rexistráronse danos materiais. Pola súa banda, a condutora presentaba “signos de embriaguez”, destacaron as mesmas fontes. Sometida ás probas de detección alcohólica, esta condutora obtivo resultado positivo de 0,51 mg/l, polo que se lle abriu expediente sancionador con multa de mil euros e a retirada de seis puntos do permiso de condución.

Por outra banda, ás 17,20 horas do sábado 5 de marzo un equipo de Atestados trasladouse á Rúa dos Gardas porque un turismo golpeara coa súa parte dianteira a traseira doutro vehículo. Os axentes mobilizados observaron que a condutora dun dos vehículos implicados presentaba “signos de embriaguez”, apuntan as mesmas fontes municipais, polo que foi sometida ás probas, nas que obtivo positivo de 0,50 mg/l. Por iso, abríuselle expediente sancionador con multa de mil euros e a retirada de seis puntos do carné.