O equipo de procura para tratar de localizar á muller de 52 anos desaparecida desde este martes no municipio lucense de Castroverde atopouna morta esta mañá. En concreto, o cadáver apareceu nunha zona con “moito monte”, ao redor dun quilómetro e medio de distancia da casa da desaparecida, cuxos familiares denunciaron a súa falta na noite do martes.
O alcalde de Castroverde, José María Arias, que participou nas batidas de onte e hoxe, confirmou a localización do cadáver. Os equipos de procura implicáronse este xoves, sobre todo, no lugar de Barredo, que se sitúa na parroquia de Franceses de Abaixo, a pouco máis dun quilómetro da vivenda. Non fixo falta explorar máis aló, o cadáver atopábase “entre uns piñeiros e unhas silvas”, precisou o alcalde, ao redor do nove e media da mañá. A muller estaba casada co tenente de alcalde do Concello da Pastoriza.
CAUSAS DA MORTE
Pola súa banda, o delegado do Goberno José Miñones apuntou en declaracións aos medios que agora terá lugar a investigación “correspondente” para pescudar se a muller faleceu por morte natural ou por “algunha cuestión”. Polo de agora, descoñécense aínda as causas do sucedido.
