O pai de Desirée Leal, a nena de sete anos asasinada pola súa nai en Muimenta, estenderá ao noivo de Ana Sandamil a denuncia por falso testemuño que tamén presentará contra os avós maternos e a directora do colexio ao que acudía a súa filla.
A sección segunda da Audiencia Provincial de Lugo condenou, de acordo co veredicto do tribunal do xurado, a prisión permanente revisable a Ana Sandamil polo asasinato da súa filla. Na sentenza, emitida o pasado luns, o tribunal considera a Sandamil autora dun delito de asasinato, coa agravante de parentesco e a atenuante de alteración mental ou psíquica, aínda que de carácter “leve”.
Tras coñecerse o fallo, José Manuel Leal sinalou que “se fixo xustiza” coa súa filla, á que a nai tentou envenenar con sedantes previamente para acabar asfixiándoa ata a súa morte. “A xustiza non me defraudou. Teño que agradecer a toda a xente que me apoiou, tamén grazas á Garda Civil por un traballo excelente e intachable”, correspondeu.
Durante o xuízo, Leal mantivo que ía denunciar varios “falsos testemuños”, entre outros pola declaración dos avós maternos e a directora do colexio onde cursaba Desirée por non detectar un acoso escolar á pequena. Agora estende esa denuncia “tamén ao noivo da asasina que foi mentir”. “En realidade todos os testemuños que levou (Ana Sandamil) foron mentir, tería que denuncialos a todos”, manifestou.
Finalmente confesa que se sentiu “algo aliviado” coa sentenza, aínda que asegurou que ten coñecemento de que os pais da asasina probablemente recorrán ante o Tribunal Superior de Xustiza de Galicia o que demorará aínda máis ese relativo consolo tras a condena a Ana Sandamil á prisión permanente revisable por asasinar á súa filla, Desirée Leal.
