O Xulgado do Contencioso-Administrativo número 1 de Lugo condenou ao Concello da Pastoriza a indemnizar con 21.156 euros á empresa que prestaba o servizo de axuda no fogar en 2020 polos prexuízos que lle causou a suspensión parcial da actividade entre os meses de marzo e maio dese ano, como consecuencia do estado de alarma decretado pola crise da covid-19.
Na resolución, a maxistrada indica que, durante ese período, a empresa abonara as nóminas do persoal, a pesar de que “só puido prestar os seus servizos a 13 dos 97 usuarios”. A suspensión, por tanto, “afectou, e de modo extraordinario, á execución ordinaria do contrato, ao alterarse substancialmente o número de usuarios, un dos seus elementos esenciais”, engade.
Así, sinala a sentenza, debe aplicarse o artigo 34.1 do Real Decreto Lei 8/2020, de 17 de marzo, é dicir, que cando a execución dun contrato público quedase en suspenso como consecuencia do estado de alarma, a entidade adxudicadora “deberá abonar ao contratista os danos e prexuízos sufridos por este durante o período de suspensión”.
Neste caso, a xuíza considera “irrefutable” que a propia administración municipal acordara a suspensión parcial da actividade, polo que a adxudicataria carecía da posibilidade de executar o contrato. Ademais, destaca que o prexuízo económico ocasionado á empresa foi “real e efectivo”, á vez que remarca que está “perfectamente acreditado” no informe económico que presentou ante o xulgado.
