O goberno local de Lugo acordou conxelar as taxas municipais durante este ano 2022 como medida para apoiar “a recuperación económica” post-pandemia.

A rexedora luguesa, Lara Méndez, e a edil de Gobernación, Paula Alvarellos, presentaron este mércores en rolda de prensa os cambios introducidos nas ordenanzas para este ano.

Segundo explicou a alcaldesa, a conxelación de taxas e impostos municipais pretende apoiar desde a administración local a recuperación económica da economía da cidade ante os efectos da crise do covid-19.

Os cambios afectan a ordenanzas como a fiscal xeral, na que se introducen modificiaciones para facilitar a administración electrónica en varios procedementos, ou a da subministración de auga potable, onde “se clarifican os casos polos que se rexe o consumo estimado no caso de inexistencia de lectura do contador”.

No caso da ordenanza que rexe as taxas pola prestación do servizo de mercado, a concelleira explicou que se amplían os usos das instalacións, que poderán acoller actividades culturais, sociais ou deportivas.

Na escolar, reflíctese a gratuidade da escolarización para os segundos fillos e sucesivos, medida que será implantada o próximo curso 2022/23; mentres que nas ordenanzas de aproveitamentos especiais da vía pública e de entrada de vehículos introdúcense cambios que afectan a tramos horarios e exencións temporais, neste caso para negocios de hostalaría.