Esta semana cumpríronse 800 anos do nacemento de Afonso X, unha figura destacada da cultura europea. Sobre o legado do monarca e a súa conexión con Galicia trata ‘Afonso X e Galicia’, un proxecto expositivo organizado polo Consello da Cultura Galega (CCG) coa colaboración da Xunta de Galicia e as deputacións de Ourense e Lugo.
Esta proposta chegou este xoves á Capela de Santa María de Lugo para amosar unha faceta pouco coñecida da súa figura e convidar a coñecer a súa influencia a través de documentos, testemuños arqueolóxicos, literarios e musicais que amosan o legado afonsino en paralelo ao esplendor da cultura galega na etapa medieval.
A presidenta do CCG, Rosario Álvarez; o delegado territorial de Lugo, Javier Arias; o vicepresidente segundo da Deputación de Ourense, César Fernández; e o deputado provincial de Artesanía e Deseño de Lugo, Efrén Castro, inauguraron esta mostra que estará aberta ata o 17 de abril. O comisario, Antonio Rossell, fixo un percorrido pola
exposición, que contará nas vindeiras semanas cun programa de visitas guiadas e un concerto.
A primeira das partes busca presentar a Afonso X na súa dimensión máis humana. A segunda está orientada a ofrecer a vida e conflitos persoais do monarca. Despois, preséntase o seu labor científico, histórico e cultural cunha recreación do obradoiro, onde o protagonismo recae nos manuscritos e nas miniaturas. De seguido, o cuarto espazo está dedicado á zona da música e dos instrumentos medievais coas distintas reproducións chegadas de diferentes espazos.
A súa obra cimeira, as Cantigas de Santa Maria, están presentes na mostra cunha escolma que se presenta simultaneamente en seis pantallas. O último espazo está dedicado a ilustrar graficamente a sociedade medieval e a vida do monarca a través das imaxes do Códice Rico do Escorial das Cantigas.
DE ROTEIROS A CONCERTOS
Antoni Rossell explicou na visita guiada que a exposición está presentada como unha proposta patrimonial, de tal xeito que a súa visita convide a visitar o legado relacionado co monarca en forma de documentos, pezas, esculturas, moeda, xoias e outros formatos que están espallados pola xeografía galega. De feito, de maneira complementaria á exposición, deseñáronse dous roteiros que percorren a provincia de Lugo. Estes itinerarios poden consultarse no web da exposición, un espazo que contén tamén textos recitados, música, informacións, as entrevistas da exposición e un audiovisual de 15 minutos de duración.
O vindeiro 2 de decembro está programado un concerto a cargo de Arts Combinatoria que leva por título “Cantigas de Santa María. Milagres da Virxe na corte de Afonso X o Sabio”. Terá lugar na centrAD e este grupo de música antiga ofrecerá un concerto que ten no seu programa unha selección de das cantigas sa, a obra lírica máis importante da música monódica medieval.
Ademais, outra das propostas programadas ao fío da exposición é unha serie de visitas guiadas á colección de instrumentos Musicais e Obxectos Sonoros. Son visitas de dous tipos, unha pensadas para estudantes e público en xeral e outra para profesionais, que se realizarán baixo demanda e con cita previa.
