A Deputación de Lugo alzouse o sábado coa Copa España Creativa 2020 polo seu proxecto para recuperar e conservar os castiñeiros da Reserva da Biosfera dos Ancares Lucenses e Montes de Cervantes, Navia e Becerreá.
O encargado de defender o proxecto e de recoller o premio nunha gala celebrada en Orihuela (Alacante), no marco do VII Foro de Cidades e Territorios Creativos, foi o responsable de Promoción Económica e Social da Deputación, Pablo Rivera Capón, xunto ao xefe do servizo provincial de Medio Ambiente, Luís Fernández Reija.
O proxecto lucense venceu na primeira fase do concurso –votación popular– co 40 por cento dos apoios, segundo informa a institución provincial. Esta posición de liderado foi ratificada este mesmo sábado polo xurado experto.
Tras esta vitoria, o presidente da Deputación, José Tomé Roca, expresou este domingo a súa “enorme satisfacción” por un premio que supón “un importante recoñecemento ás políticas e á estratexia” que promove para “apoiar ao rural e ao sector primario”.
Debido ao galardón, a institución lucense será a encargada de organizar o VIII Foro de Cidades e Territorios Creativos. “Sen dúbida, ser a sede deste certame no 2022 contribuirá de maneira moi importante á promoción de Lugo a nivel nacional e mesmo internacional, da nosa riqueza patrimonial, ambiental, cultural ou gastronómico, o que terá un impacto positivo na actividade do turismo e da hostalaría durante a celebración do congreso e tamén a medio e longo prazo”, destacou Tomé.
