O Club Deportivo Lugo sumou o primeiro punto en Liga ao empatar na súa visita ao Granada C.F. (1-1) grazas a un gol do extremo José Carlos Lazo, canteirán do Real Madrid, no minuto 74.

O Granada Club de Fútbol foi claramente superior ao inicio. Ao cuarto de hora, o equipo adestrado polo vigués Diego Martínez púidose adiantar con cabezazo do dianteiro Rodri despois dun centro de Álex Martínez. No minuto 19, paradón de Juan Carlos Martín tras un cabezazo de Ángel Montoro despois dun centro de “Quini”. No minuto 24, nova ocasión de Rodri, que cun zurdazo colocado provocou un novo paradón de Juan Carlos. Dous minutos despois, o 1-0. Cristian Herrera perde un balón en campo propio que recupera Antonio Puertas, Fede Vico asiste cara atrás e Puertas marca a bocaxarro. A partir de aí, mellorou o Lugo. Antonio Campillo, novidade no once, realizou no minuto 34 un pase marabilloso a Cristian Herrera, que rematou ao primeiro toque e parou o porteiro local Rui Silva.

Na segunda parte, entran Dani Escriche e José Carlos Lazo no minuto 65. Confírmase a melloría do Lugo. No minuto 74, un centro de Vasyl Kravets, sempre vertical, non é despexado pola defensa nazarí, Jona Mejía non remate no primeiro pau e Lazo, chegando dende atrás con convicción, remata a gol á altura do segundo poste. Dende aí, o Granada buscou a vitoria sen atopar apenas profundidade.