O que foi alcalde da capital lucense, José López Orozco, asegurou sentir “alegría e alivio” tras coñecer que o fiscal solicita o sobresemento da causa contra el na peza instruída polo Xulgado de Instrución Número 1 de Lugo, cando Pilar de Lara era o seu titular, para investigar a existencia de supostas irregularidades na adxudicación do sistema ORA da cidade a cambio de subornos.
López Orozco incidiu en que o informe presentado polo ministerio público “é claro e contundente”, polo que agora espera que “sexa tido en conta”, como xa sucedeu “noutras ocasións, polo señor xuíz”.
De ser así, lembrou, quedará “libre desa mochila que transportou durante nove anos”, dado que a citada causa é a última na que figura como investigado, despois de que se fose caendo, unha a unha, a decena de imputacións que tivo que afrontar na parte final do seu mandato.
“CONTENTO”
“Estou moi contento. A miña familia está moi contenta. E estou seguro de que moitos veciños de Lugo tamén o están, porque sempre confiaron no seu alcalde”, engadiu. De feito, espera que o que lle sucedeu a el sirva “para que os políticos aprendamos, para que se respecte a presunción de inocencia ata que exista unha sentenza”.
