Os xardíns do Centro de Emprendimiento Municipal CEI-Nodus acolleron o martes 20 de xullo a presentación final dos 21 proxectos empresariais promovidos pola VI edición do Inicia Coworking, programa gratuíto que desenvolve o Concello de Lugo en colaboración coa EOI (Escola de Organización Industrial) para aumentar as probabilidades de éxito de proxectos innovadores en fase temperá de desenvolvemento.

A alcaldesa lucense, Lara Méndez, acompañada da edil de Desenvolvemento Local e Emprego, Ana González, destacou a valentía e a fortaleza dos 27 emprendedores que están ao fronte destas iniciativas de negocio, “xa que sodes a segunda xeración de empresas que axudamos a nacer en plena pandemia”. A primeira xeración xurdiu o ano pasado, durante a V edición do coworking, da que xerminaron 26 proxectos.

A rexedora, que abriu a sesión de presentación dos proxectos en sociedade, acto de gran transcendencia porque lles servirá aos emprendedores para acadar financiamento se o necesitan, puxo en valor que as mulleres lideren o 60% destas iniciativas. Ademais, dos 21 negocios, 7 están xa facturando e 4 teñen a súa sede no viveiro do CEI Nodus.

A alcaldesa felicitou tamén ao equipo de formadores do coworking, que enfocaron aos emprendedores durante cinco meses no desenvolvemento e a validación do seu modelo de negocio, no plan comercial, técnicas de venda, oratoria e plans de mercadotecnia dixital, entre outros aspectos. Ademais, contaron con titorías personalizadas. Das cinco edicións anteriores do Inicia Coworking xurdiron 115 proxectos empresariais, dos que 70 están facturando e que crearon 350 postos de traballo directos, máis os indirectos. O índice de supervivencia dos negocios nados co CEI Nodus é do 75%