A Policía Local denunciou a un veciño de Lugo por subir a música a un volume elevado, así como berrar nas escaleiras dun edificio á mantenta tras ser advertido de ruídos molestos cando celebraba unha festa.
Segundo relatou a Policía Local, sobre as 3,55 horas do pasado 25 de xuño unha patrulla acudiu a un edificio na rúa Camiño Real porque veciños denunciaban “ruídos molestos” que procedían dunha vivenda.
Os axentes comprobaron que se escoitaba música en ton “moi elevado e actividade humana que imposibilita o descanso” dos veciños, polo que foi identificado o responsable, ao que se lle ordena que cesen as molestias inmediatamente.
O individuo manifestou que estaba cuns amigos “tomando unhas copas” e accedeu a finalizar a festa, destaca a Policía Local. Con todo, cando os axentes abandonaban o lugar comprobaron que o identificado volveu conectar o equipo de música e deu varias portadas, ademais de saír ás escaleiras do edificio “gritando e vociferando coa clara intención de molestar e prexudicar aínda máis aos veciños”, subliñan as mesmas fontes.
“DESOBEDIENCIA REITERADA”
Por iso, os axentes tramitaron acta denuncia por infracción grave á Lei orgánica de protección da seguridade cidadá pola “desobediencia reiterada” aos mandatos dos axentes da autoridade no exercicio das súas funcións, con “grave prexuízo” para os veciños.
Deste xeito, foi proposto para sanción de 601 a 30.000 euros á Subdelegación do Goberno, como órgano competente para a tramitación do expediente sancionador, indica a Policía Local.
Tamén se levou a cabo acta de denuncia por infracción á Ordenanza de Protección Ambiental polos ruídos e molestias ocasionadas aos veciños do inmoble.
