A pandemia de Covid mantense a raia na área sanitaria de Lugo, Monforte e A Mariña. De feito, é a única zona de Galicia que nesta última xornada aguanta e non repunta as persoas enfermas de covid que require hospitalización, que seguen no total de 12, das que tres están na UCI. Con todo, Lugo tamén é a excepción, xunto con Ferrol, na tendencia de casos activos, que volven aumentar en dez persoas ata o total de 244. No que se refirre aos novos contaxios descubertos nas últimas horas, a área de Lugo suma 18, segundo os datos publicados este domingo pola Consellería de Sanidade, solicitados ata as 18,00 do sábado.
NO CONXUNTO DE GALICIA
Galicia cumpre a terceira semana sen estado de alarma cun repunte importante da presión hospitalaria pola pandemia de covid-19, xa que os ingresados subiron en 10 nas últimas 24 horas, ata o total de 117. Iso si, os casos activos da enfermidade volveron a baixar por oitavo día consecutivo e sitúanse en 2.300, debido a que as altas seguen superando aos novos contaxios. No que respecta á presión asistencial, a subida no número de ingresados débese ao aumento dos pacientes en planta, que suman 89 –10 máis–, aínda que os de unidades de coidados intensivos se manteñen sen variacións, nos 28.
Desde o inicio da pandemia, Galicia realizou 2.247.556 PCR, o que permite deducir que nas últimas 24 horas se fixeron 5.779 probas. Son unhas 300 máis que o día anterior. Polo seu lado, a taxa de positividade mantense no 1,9%, valor que segue por baixo do 5% que a Organización Mundial da Saúde (OMS) fixa para dar por controlada esta pandemia. A última vez que Galicia excedeu esta barreira foi o 15 de febreiro.
