O lucense Xurxo Morales Varela, de 17 anos, vén de acadar en Andorra o terceiro premio internacional de saxofón na sección de xoves talentos. Xurxo Morales Varela participou nesta sección do certame como único representante de España e competiu con outras nacionalidades como Francia, Rusia e Italia. Formado no Conservatorio e en centros de ensino musicais de Lugo estivo á altura de saxofonistas formados en Versalles e Moscú, dos que procedían os outros premiados.
O mozo lugués estudante de saxofón asistía esta semana (26 de marzo a 1 de abril) ás xornadas internacionais de saxofón, Andorra Sax Fest’21 que se celebran anualmente en Andorra la Vella, baixo a tutela dalgunhas das máis prestixiosas figuras do saxofón clásico (Claude Delangle, Alain Crepin, Vicent David, Mariano García, Nikita Zimin…).
“O Terceiro Premio acadado, supuxo un estimulante recoñecemento, ao tratarse da súa primeira participación, resultando ser o único partipante de España premiado en calquera das categorías”, recolle o comunicado remitido. Como concursante na sección de ata 17 anos de idade, clasificouse a continuación de Chiara Beatrice Cannavale (Italia, 1° Premio) e Dmitry Pinchuk (Rusia, 2° Premio).
“Unha das sensacións máis gratificantes da recepción do premio foi poder contestar ás preguntas dos profesores do xurado sobre o centro de procedencia”, destacou o mozo. Puido nomear con orgullo o Xoan Montes de Lugo a carón dos de Versalles e Moscú, dos que procedían os outros premiados. Morales manifestou que se sente en débeda coa dirección do Conservatorio de Lugo, de onde saen excelentes músicos lugueses aos que toma por referentes. “Aprecia a implicación con que exercen docencia nas Artes Escénicas en tantas Escolas e Conservatorios de toda Galicia persoas como o seu profesor principal, Alberto López”, apunta o comunicado.
Entre os docentes que lle ensinan neste seu derradeiro curso en Lugo (6o de Grao Profesional) destaca a Marcos Mariño, Laura López, Henar Matesanz, Marta Couce, Dolores Carrera, Francisco Piñeiro e Adrián Real. Sen esquecer a grandes saxofonistas que o influencian nos últimos anos en Galicia, como Álex Troya, Adrián Pais e Toño Otero.
