A delegada do sindicato de enfermaría Satse en Lugo, Verónica Peteiro, pediu este xoves que se reforcen os persoais de Enfermaría en Atención Primaria na provincia co fin de evitar e frear a “sobrecarga” de traballo destes profesionais ante a campaña de vacinación contra a Covid.
Por parte de Satse advírtese de que coa vacinación “as enfermeiras ven incrementado o seu traballo diario, xa de por si sobrecargado, posto que teñen que asumir esta nova faceta, que á vez repercute no resto de compañeiros que ven aumentadas, mesmo duplicadas, as súas axendas de traballo e que teñen que seguir atendendo urxencias ou domicilios”.
“Agora estamos a asumir a vacinación e non se está substituíndo o persoal que asume estas funcións. Estannos bloqueando a axenda e non se está reforzando para nada a Atención Primaria”, lamentou Verónica Peteiro.
En canto ao persoal a incorporar, a sindicalista puntualizou que “iso depende do centro”, aínda que destaca que “se nun centro hai dúas persoas dedicadas, neste caso debería de haber dúas máis para cubrir eses ocos que deixan esas persoas cando fan este labor”. Satse denuncia que “a cobertura dos profesionais é practicamente nula”. “Con todo a xerencia culpa desta situación á falta de aspirantes nas listas de contratación”, conclúe.
Finalmente, Verónica Peteiro asegurou que “non” están a ter “problemas” á hora de administrar as vacinas en Lugo, dado que “a maior xente da poboación está satisfeita e de feito mesmo teñen moitas ganas de que lles toque a súa quenda”.
