Un grupo de 500 alumnos do grao de Veterinaria do Campus Terra realizarán prácticas na Granxa Experimental de Leite que a Deputación de Lugo puxo en marcha en 2020 na súa leira Gayoso Castro, en Castro de Rei.
Na Granxa Experimental de Leite, “o primeiro centro público de Galicia que aglutina formación e investigación universitarias sobre o sector lácteo”, tal e como indicou a Deputación nun comunicado, os estudantes realizarán as prácticas correspondentes ao segundo cuadrimestre de catro materias diferentes do Grao: Enfermidades Parasitarias, Cría e saúde animal, Nutrición e alimentación, e Reprodución e Obstetricia.
Os alumnos, organizados en grupos pequenos “para que a experiencia sexa o máis personalizada posible e póidanse gardar as distancias como medida de prevención da Covid-19″, analizarán temas de parasitología e simularán escenas de desparasitación, estudarán a alimentación dos animais e farán un seguimento dos embarazos.
As instalacións, agora mesmo con 36 vacas que producen, de media, 1.500 litros de leite, teñen capacidade para 70 vacas produtoras e 12 secas. Ademais, conta cunha nave para gañado de leite, unha de maquinaria, un aulario habilitado para 40 alumnos e 20 prazas de persoal investigador, unha fosa de xurro e dous silos de formigón.
A institución provincial destinou 1.250.000 euros para a construción e dotación destas instalacións, o que supón o 90% do investimento necesario -o 10% achegouno a Universidade de Santiago de Compostela–, e asume ademais o 100% dos gastos de funcionamento.
“O obxectivo desta dotación pública é pór a formación, a investigación e a innovación ao servizo do sector primario da provincia para promover o desenvolvemento do rural“, remarcou a Deputación de Lugo.
