A área sanitaria de Lugo rexistra este luns 15 de febreiro un total de 1.171 casos activos por coronavirus. Son 65 menos ca os que había onte. Ademais, nas últimas 24 horas confirmáronse 35 positivos novos a través de PCR, polo que tamén se mantén a tendencia á baixa no número de contaxios detectados.
Cousa distinta é a presión hospitalaria que, a pesar de que non vai a máis, semella que costa diminuíla. O Sergas comunica hoxe que hai 87 pacientes de Covid ingresados (un menos ca onte): deles, 61 están en planta (38 no HULA, 9 na Mariña, 13 en Monforte, 1 no Polusa) e os outros 26 na unidade de críticos do Hospital Universitario Lucus Augusti.
En canto á cifra das vítimas mortais, esta xa se eleva ata os 191 falecidos tras notificar onte o Sergas tres decesos máis na provincia. Por outra parte, dende o inicio da pandemia curáronse 9.943 persoas e realizáronse 176.844 PCR.
GALICIA, LEVE REPUNTA NOS HOSPITAIS
No que respecta á comunidade galega, a presión hospitalaria repuntou lixeiramente e rexístranse 19 pacientes máis ingresados que a xornada anterior, polo que volven ascender de novo por encima do milleiro -cifra da que baixaron este domingo-. No entanto, os contaxios diarios descenderon a 372 e os casos activos baixaron a 13.052. Podes ler a información completa no Galicia Confidencial.
