EFE | Axentes do Corpo Nacional de Policía (CNP) detiveron onte na estación de autobuses de Lugo a un perruqueiro que regresaba á cidade despois dunha viaxe a Cataluña e traía canda si 330 gramos de cocaína ocultos no interior dun cacho de pan, aberto para facer un bocadillo.
Despois dunha investigación policial iniciada o ano pasado, no transcurso da cal foran arrestadas varias persoas por distribución de drogas na contorna da rúa García Abad, o agora detido deixou o salón de peiteado que rexentaba, supostamente coa intención de regresar ao seu país de orixe.
Ao ter coñecemento do seu regreso á cidade e ante as sospeitas de que podería estar a se dedicar de novo á venda de substancias estupefacientes, a Policía Nacional despregou un dispositivo de vixilancia para ter controlada a súa contorna.
Grazas a esas pescudas, a policía tivo coñecemento de que o sospeitoso viaxara en tren a Barcelona, de modo que se puxo en marcha unha operación para controlar o seu regreso á cidade.
Onte pola mañá, foi detectada a súa presenza polos axentes de servizo cando se baixaba dun transporte procedente de Cataluña na estación de autobuses de Lugo. Tras recoller a súa maleta, o sospeitoso foi interceptado e os axentes empezaron a rexistrar os vultos que portaba.
MÁIS MATERIAL INCAUTADO
Nun paquete que levaba no interior dunha bolsa de man, os axentes atoparon 160 gramos de substancia de corte e un bocadilloo, en cuxo interior acharon 330 gramos de cocaína protexidos cun envoltorio de plástico. O sospeitoso tamén levaba encima 16 gramos de marihuana, un blíster con pastillas e 205 euros en efectivo.
Posteriormente, no rexistro realizado no salón de peiteado da súa propiedade, foron intervidos catro blísters con pastillas, unha pistola de aire comprimido e envoltorios de plástico, supostamente utilizados para a venda de droga polo miúdo. O detido será posto hoxe a disposición xudicial.
