EFE | Un pai identificouse en Lugo como autor dun atropelo nun paso de peóns, pero a Policía Local comprobou que quen ía ao volante do coche era o seu fillo, que se deu á fuga e que, posteriormente, deu positivo nun control de alcoholemia.
Segundo informou a Policía Local, o atropelo produciuse ás 23:30 horas de onte, 14 de xaneiro, na confluencia da Rúa Santiago coa Rolda da República Arxentina, cando unha persoa que cruzaba polo paso de peóns cos seus cans foi tirada por un vehículo que se deu á fuga.
Aos poucos minutos de chegar os axentes, un home presentouse no lugar do accidente e dixo ser o condutor do vehículo e responsable do atropelo. Con todo, os axentes non lle deron credibilidade ao seu testemuño e, tras as correspondentes investigacións, comprobaron que era o seu fillo o que ía ao volante do vehículo.
Foi localizado e, ao ser sometido ao correspondente control, deu unha taxa de 0,75 miligramos de alcol por litro de aire expirado, tres veces máis do permitido pola lei. Os axentes instrúen dilixencias contra el por un suposto delito contra a seguridade viaria para o seu traslado ao Xulgado de Garda.
O peón foi evacuado nunha ambulancia do 061 ao HULA para recibir atención médica e os cans trasladados ao hospital clínico veterinario Rof Codina.
