O presidente da Asociación Provincial de Empresarios de Hostalaría de Lugo, Cheché real, calculou que a facturación do sector nos primeiros días de reapertura foi “baixa”, polo que insistiu en reclamar “indemnizacións” aos gobernos polo peche decretado durante un mes.

No medio dunha ponte na que Galicia iniciou a súa propia desescalada progresiva na hostalaría, Real volveu a lanzar esta petición porque a Xunta lles “impediu abrir” os seus negocios e “exercer libremente” o seu “dereito a traballar”.

Por isto mesmo, o presidente dos hostaleiros lucenses explicou que xa non solicitan “un rescate” aos gobernos, como moitas das súas asociacións homólogas, senón “indemnizacións”.

E é que, aínda que estes días puideron volver levantar os enreixados dos seus negocios ao relaxarse as restricións na cidade, a facturación foi “baixa”, en parte tamén polo “temporal de neve, vento e frío” que afectou a toda a provincia.

Ademais, Cheché Real criticou as porcentaxes cos que poden abrir os locais en Lugo 30 por cento no interior e un 50 por cento en terrazas-: “Son imposibles para os negocios”. “Así é moi difícil abrir, mesmo algúns non quixeron porque non ían ter beneficio de ningún tipo. E algún abriu a perdas”, censurou finalmente.