A Consellería de Sanidade informa de que na área de Lugo se confirmaron 75 novos casos de coronavirus nas últimas 24 horas a través de probas PCR. Tralas altas diagnosticadas no día de onte, os casos activos quedan finalmente en 1.049 (33 máis ca o mércores).
Aumenta a presión hospitalaria ao ingresar cinco persoas máis. Alcánzase así a cifra de 48 pacientes, distribuídos da seguinte maneira: 30 no Hospital Universitario Lucus Augusti (HULA), dos cales 5 permanecen na UCI; 15 no Hospital da Mariña; e 3 no de Monforte.
No día de onte non se notificou ningún falecemento de persoas diagnosticadas con coronavirus na provincia de Lugo, polo que o total de mortes documentadas dende o inicio da pandemia mantense en 101.
Ademais, segundo a actualización diaria de datos do Sergas, ata hoxe realizáronse 83.071 PCR na área de Lugo, o que implica que nas últimas 24 horas se efectuaron 938 probas.
GALICIA
Tamén en Galicia seguen en alza os contaxios por Covid-19 tras confirmarse 734 por PCR nas últimas 24 horas en Galicia. Deles, 240 pertencen á área de Vigo. Ademais, os casos activos aumentaron noutros 253 ata situarse en 9.895, e increméntanse en todas as áreas salvo nas de Ourense e Santiago. En Galicia morreron ata o momento 960 persoas con Covid-19.
