A Policía Local de Lugo localizou en Paquistán un menor coa súa familia tras recibir un aviso para a súa localización ao non incorporarse ao seu centro educativo no municipio.
Segundo informou a Policía Local, foron os Servizos Sociais municipais os que solicitaron a localización deste rapaz, cuxa residencia xa non se atopaba en Lugo, tal como se comprobou máis tarde. A Unidade Territorial de Policía de Barrio localizou o pai do mozo a través das redes sociais e este explicoulles que, a consecuencia da crise sanitaria e económica da Covid-19, decidiran trasladarse a Paquistán.
Así mesmo, indicou que o seu fillo e o resto da familia atopábanse “en bo estado” e facilitou un teléfono de contacto para que os Servizos Sociais do Concello de Lugo “se puxesen en contacto con el cando quixesen e así falar directamente co menor para comprobar que se atopaba ben”, engadiu a Policía Local.
