O xerente da área sanitaria de Lugo, Ramón Ares, constatou “un incremento importante” de casos activos de Covid-19 a fin de semana, cuxa orixe sitúa en “reunións familiares”.

Ares explicou que a situación en “a cidade de Lugo segue sendo preocupante”. “Xa viñamos dunha semana onde tivemos un incremento no número de casos e esta fin de semana o comportamento foi igual, cun incremento importante”, destacou.

Esta subida nos positivos hai que delimitala a que “son todos contactos de casos xa existentes, e estas cadeas de transmisión prodúcense no ámbito familiar”.  Por iso, Ares insiste en que se deben manter todas as medidas de vixilancia e seguridade en todo momento.

CONSECUENCIAS NOS HOSPITAIS

O xerente admite que lle “preocupa” esta situación, porque “ten a súa afectación tamén na presión asistencial, que aínda que está estable incrementouse en Monforte (Hospital de Monforte) e Burela (Hospital da Costa)”. Neste último, permanecen ingresados 6 pacientes; en Monforte, 7; e no HULA, 20 en planta e 4 na Unidade de Coidados Intensivos.