A Policía Local de Lugo tramitou denuncias a catro mozos que foron sorprendidos cando facían un botellón na capital luguesa na tarde do pasado sábado 31 de outubro.
Segundo o relato policial, os rapaces atopábanse preto dunha residencia de maiores na Avenida de Infanta Elena. No momento da identificación, os axentes comprobaron que “non eran conviventes”, polo que tramitaron actas de denuncia por incumprir o decreto que limita as reunións e a normativa que prohibe a celebración de botellóns.
MÁIS DENUNCIAS
Ademais, durante a fin de semana a Policía Local tramitou actas por infracción á Lei de Saúde de Galicia por dúas persoas non conviventes que se atopaban en espazo público sen levar a máscara obrigatoria.
Así mesmo, outras dúas persoas foron denunciadas por fumar nun espazo de uso público sen gardar a distancia de seguridade co resto de persoas.
