O parlamentario do PPdeG José Manuel Balseiro considera que “os postos hai que renovalos” tras a súa substitución como delegado da Xunta en Lugo e non ve un “castigo” a súa saída tras catro anos no cargo.
“Non hai que velo nesa clave”, resolveu o deputado popular, que asegura que este cambio o que supón é “volver a unha casa” que coñece “ben”. “É unha casa (o Parlamento galego) na que me atopo ben”, abundou.
En canto á súa saída do cargo, atribuíuno a que “os postos hai que renovalos e iso é importante, veñen novas xeracións”. “Eu tamén vou tendo a miña idade, aínda que tamén é certo que a idade che dá unha certa experiencia e iso hai que valoralo”, subliñou.
Balseiro insistiu en soster que non se trata dun “castigo”, el non ten “ese concepto”, e aproveitou para avanzar que vai seguir a disposición do presidente da Xunta, Alberto Núñez Feijóo, “e a disposición do partido para todo o que consideren os militantes, os alcaldes e os cargos do partido, en que poida ser necesario ou útil”.
En canto a estes catro anos, o exdelegado confesou que foron “de intenso traballo, de moitas horas practicamente todos os días da semana”. “Houbo unha implicación moi importante e creo que se conseguiron os obxectivos que se traían cando cheguei á delegación. A partir de aí só me queda agradecer ao partido, ao presidente da Xunta, que me deron esta oportunidade de poder estar catro anos á fronte desta delegación”, manifestou.
Finalmente Balseiro asumiu que ten “unha débeda de gratitude, sobre todo cos militantes do PP na provincia, cos distintos concelleiros, cos alcaldes e portavoces do Partido Popular e nunca houbo un só rozamento neste catro anos”, subliñou. “Todo foi colaboración para que todo saíse ben, pero eu vou seguir traballando, desde o parlamento, pola provincia de Lugo”, concluíu.
