Novo paso adiante para conformar un marcroparque no concello de Antas de Ulla. O Presidente da Deputación de Lugo, José Tomé Roca, vén de asinar na mañá deste martes, a compra dunha segunda remesa de parcelas que achega á realidade o plan de crear o “parque central de Galicia”. As terras, divididas en catro seccións, supoñen unha extensión conxunta de 12.899 metros cadrados.
Segundo explicou o órgano provincial, o paso adiante logo será seguido dunha terceira compra que poñerá fin á acumulación de parcelas e dará espacio, á fin, para botar adiante o proxecto. Tomé destacou que a venda da derradeira finca “xa está acordada”, quedando tan só queda que os propietarios da finca resolvan cuestións relacionadas con herdanzas familiares. En total, a Deputación investiu uns 120.000€ para a compra das seis fincas.
Deste xeito, o “Parque Central de Galicia” contará con seis parcelas cunha extensión total de 20.466 metros cadrados. A primeira finca adquiriuna no mes de xuño e conta con 4.343 metros cadrados; as catro que comprou hoxe teñen unha superficie conxunta de case 13.000 metros; e a última pendente, de 3.220 metros cadrados.
Unha vez comprada esta última parcela, a Deputación anuncia redactará o proxecto de acondicionamento e “posta en valor” do que califican como “un gran espazo público de lecer e natureza” que estaría situado no centro xeográfico de Galicia, no lugar de Nugallás. A previsión da institución é ter a actuación rematada no 2022.
