O xulgado decretou prisión provisional comunicada e sen fianza para o home de 53 anos detido en Lugo pola violación da neta da súa exparella, menor de idade.

Así o confirmaron fontes xudiciais, que apuntan a que o home está sendo investigado por un delito contra a liberdade sexual dunha nena menor de 16 anos. Tampouco poderá achegarse ou comunicarse coa vítima.

Segundo a información da Policía Nacional, os feitos ocorreron o pasado domingo no domicilio do propio detido, aínda que as forzas da orde tiveron coñecemento do suceso tras abrirse o protocolo por parte dos servizos médico-pediátricos do Hospital Lucus Augusti (HULA).

En concreto, as dependencias da Policía Nacional recibiron na mañá do luns a alerta por unha posible violación a unha menor que estaba a ser atendida no centro hospitalario.

Deste xeito, presentouse no lugar o coordinador de Servizos da Comisaría Provincial para facerse cargo da investigación. Seguidamente, puxo os feitos en coñecemento dos funcionarios especializados nestes casos.

Este equipo entrevistouse os familiares da vítima, que relataron que a menor pasara o domingo no campo coa avoa e co exmozo desta.

A violación, segundo relata a Policía Nacional, produciuse cando a vítima acudiu ao domicilio do home a deixar unhas pertenzas, antes de ser levada a casa.