A Xunta de Galicia tomou a decisión de intervir a residencia de maiores DomusVi Lugo, no municipio de Outeiro de Rei. O executivo galego decide isto “tralo incremento no número de positivos por coronavirus rexistrado hoxe”.
Nunha nota de prensa enviada pola Consellería de Sanidade, anúnciase que “tras avaliar a evolución epidemiolóxica do centro coas consellerías de Sanidade e Política Social”, ambas as dúas “acordaron tomar esta decisión para garantir a calidade asistencial e a correcta protección da saúde dos residentes e traballadores do centro“.
Con esta intervención sanitaria da residencia, “os profesionais do Servizo Galego de Saúde farán un seguimento médico constante das persoas usuarias” das instalaccións. Tamén supervisarán a correcta aplicación dos protocolos aprobados pola Xunta de Galicia.
A decisión tomouse tamén no mesmo día en que se coñecen os resultados do segundo cribado practicado na residencia, cando se realizaron 168 probas PCR tanto a residentes como a traballadores. Neste cribado detectáronse 94 novos positivos entre os usuarios e 5 entre os profesionais.
