O Servizo Galego de Saúde (Sergas) prevé realizar este mércores probas a uns 150 traballadores en relación co brote de COVID-19 con seis casos viculados cun xornaleiro no municipio de Castro de Rei.
Así o informaron fontes da área sanitaria de Lugo, que ratificaron que ata a tarde deste martes detectáronse seis positivos e medio centenar de persoas estaban en corentena. Desde este mércores o Sergas vai facer as probas a “todos os traballadores da empresa”, ratificaron as mesmas fontes, “uns 150 máis” dos que xa se fixeron ata a data.
O cribado estenderase, deste xeito, a toda a empresa, sexan ou non contactos dos positivos “para garantir a seguridade”, subliñaron as mesmas fontes. As persoas que deron positivo son xornaleiros que traballan na campaña da fresa nos municipios lucenses de Cospeito, Castro e Begonte, moitos deles de nacionalidade senegalesa.
O edificio onde se aloxan estas persoas con positivo en Castro Ribeiras de Lea atópase en corentena, segundo confirmaron por parte do Concello de Castro de Rei.
