A alcaldesa de Vilalba, Elba Veleiro, considera que o foco de coronavirus detectado no seu municipio está controlado, porque as probas PCR realizadas polo Sergas nos últimos días permitiron comprobar que todos os casos positivos circunscríbense “ao ámbito familiar”.
En declaracións a Cope Lugo, recollidas por Efe, a alcaldesa informou de que este martes lle foi confirmado un novo positivo, o que eleva a 5 o número de contaxios en Vilalba, aos que habería que sumar outros dous no municipio veciño de Xermade, todos membros da mesma familia.
En todo caso, lembrou que “o primeiro foi detectado o luns” da semana pasada, de modo que “case, case” están a piques de saír “da corentena” sen que o número de positivos aumentase de momento de forma preocupante. “Dentro duns días, a finais desta semana, van empezar a saír da corentena”, insistiu, e “todos os positivos son do ámbito familiar. Non saíu de aí”.
