EFE | O Concello de Castroverde está a impulsar un “plan pioneiro en Galicia” para facilitar a reagrupación de terras agrarias e forestais co obxectivo final de facer máis rendibles as explotacións agropecuarias do municipio.
O alcalde de Castroverde, Xosé María Arias, informou de que o Concello lanzará “nas próximas semanas un plan de subvencións pioneiro en Galicia, dotado cunha partida orzamentaria de 200.000 euros, para favorecer a agrupación de parcelas no municipio”.
Arias explicou que os técnicos do Concello están a traballar estes días na elaboración das bases que regularán a concesión desas axudas municipais, para crear “parcelas máis grandes que sexan rendibles para o sector da agricultura e a gandería”, que considera “vitais” para a economía local e para fixar poboación no rural.
O rexedor explicou que a administración local concederá axudas “a todas aquelas agrupacións de propiedades” que se produzan mediante “permutas voluntarias entre titulares de parcelas agrarias ou forestais, residan ou non no municipio”.
BASES EN CONSTRUCIÓN
“Un dos requisitos principais para que as subvencións sexan aprobadas é que se unifique, polo menos, un 20% do número de parcelas iniciais”, dixo o alcalde, quen tamén avanzou que os propietarios dispoñerán dun prazo amplo, de oito a dez meses, para chegar a acordos voluntarios con outros titulares e presentar así “un proxecto consolidado”.
Unha comisión municipal encargarase de avaliar as diferentes propostas e daráselle prioridade a aquelas leiras que se reagrupen na “contorna de núcleos rurais”. Ademais, os beneficiarios das axudas quedarán exentos de impostos municipais e dispoñerán de “asesoramento técnico”. “As explotacións agrogandeiras verán diminuír os custos de produción, ordenaremos o territorio e usaremos o campo como devasa”, dixo Arias.
O alcalde presentoulle este plan ao secretario xeral do sindicato Unións Agrarias, Roberto García, quen asegurou que Castroverde será “punto de referencia para a Galicia rural” e este programa supoñerá “un antes e un despois na concentración de leiras, unha demanda que levamos anos reivindicando”.
