A Garda Civil procedeu a investigar a tres mozos veciños de Becerreá por ameazar unha persoa no transcurso dunha pelexa cunha arma branca.

Segundo informou o Instituto Armado, os imputados son tres cidadáns de orixe romanés e de 32, 25 e 23 anos de idade, respectivamente. Están relacionados cun delito de ameazas con arma branca e outro de lesións.

Os feitos comezaron nun establecemento hostaleiro da localidade de Becerreá cando a vítima se atopaba na terraza do local. Daquela, xurdiu unha discusión por motivos que se descoñecen e os tres mozos acabaron por marchar do lugar. Porén, cando a agora vítima se atopaba no seu domiclio, os tres homes presentáronse no lugar e realizaron varias ameazas e incluso unha lea entre uns e outros.

A vítima, puntualizou a Benemérita, tivo que ser atendida no Punto de Atención Continuada (PAC) da localidade do Corgo por mor das lesións que presentaba. Mentres, as persoas investigadas foron postas a disposición xudicial.