Os hostaleiros da cidade de Lugo mostraron o seu descontento por ter que facer fronte ao pago da imposto da auga e recollida de lixo, un cobro que pertence ao primeiro trimestre do ano e que inclúe as primeiras dúas semanas do estado de alarma.
O colectivo da hostalaría da cidade das Murallas advirte da “situación límite” que atravesan moitos establecementos despois de case dous meses coas portas pechadas, polo que consideran un “novo pau” o pago deste imposto municipal.
A alcaldesa de Lugo, Lara Méndez, sinalou na mañá deste xoves que “continúan traballando tanto na vía dos ingresos como dos gastos” e que é “comprensible a situación de vulnerabilidade na que se atopan”.
Así, tras apuntar que o goberno local pretende “continuar traballando en favor de todos os sectores”, a rexedora lembrou tamén que “evitaron que as empresas teñan que facer pagos como o do IBI, ou o pago das terrazas”.
Pola súa banda, o grupo municipal do PP cargou contra o goberno lucense, ao que acusaron de anunciar axudas municipais das que “non pagaron nin un só euro dous meses despois”.
