Os centros asistenciais do Sergas na provincia de Lugo súmanse hoxe, 5 de maio, á celebración do Día Mundial da Hixiene de Mans no marco da campaña ‘Salva vidas: limpa as túas mans’. Profesionais sanitarios do Hospital Universitario Lucus Augusti (HULA) conmemoraron a xornada, que este ano homenaxea o sector da enfermería e matronas.
A Organización Mundial da Saúde propuxo como lema ‘Enfermaría e matronas. Atención limpa. Está nas túas mans’ co obxectivo de “empoderar” estes traballadores e traballadoras, que “co seu labor de prevención e control de infeccións” manteñen os nosos pacientes a salvo, segundo resalta o Sergas.
É tamén unha homenaxe “pola súa dedicación e entrega nos coidados durante esta epidemia” e polo seu “papel determinante” no fortalecemento da calidade de atención.
Así, o HULA distribuíu información por todo o centro para concienciar da importancia da hixiene de mans a traballadores e pacientes. Na web tamén se dispuxeron recursos acerca disto. “Salvar vidas está nas túas mans”, lembran.
