A Asociación Provincial de Empresarios de Hostalaría e Turismo de Lugo (APEHL) cre que os Expedientes de Regulación Temporal de Emprego (ERTE) deberían de estenderse seis meses despois de que finalice o estado de alarma ao considerar que o sector “tardará en volver aos niveis que tiña antes desta crise”.
Así o manifestou o presidente desta asociación, Cheché Real, en declaracións a Europa Press. “Isto non vai terminar co estado de alarma“, resaltou. Asume que este 2020 xa está “perdido” e que tardarán “un ano aproximadamente” en recuperar a situación económica previa.
Por iso, dende esta Asociación de Hostalaría e Turismo solicitan que os ERTEs sexan ampliables a seis meses “para tratar de sobrevivir”. Segundo Real, a idea non é destruír emprego, “senón que o sector volva activarse aos poucos” para volver nun futuro “a contratar xente”, engadiu.
ARDE LUCUS
En canto a unha posible data para a reapertura dos establecementos, comentou que se baralla “principios de xuño como moi pronto” e, matizou, “con medidas moi restritivas”. Iso “vai facer que o proceso de recuperación económica sexa máis lento”.
En canto ao Arde Lucus, que non foi cancelado polo momento, Real argumenta “que non ten ningunha posibilidade de celebrarse” porque “o bicho vai seguir aí”. Ademais, destacou que “a saúde está por encima de todo”.
