O presidente da Deputación de Lugo, José Tomé Roca, asinou un decreto para “garantir o mantemento de todos os contratos e o volume de facturación” das empresas adxudicatarias de servizos públicos durante os paróns de actividade derivados da crise do coronavirus.

O obxectivo, segundo informa o goberno provincial, é “manter e protexer os postos de traballo”. En palabras do seu presidente, isto contribuirá a que “a viabilidade empresarial non se vexa resentida nestes momentos tan difíciles”.

“Pomos todas as medidas ao noso alcance para que non recorran a despedimentos ou expedientes de regulación temporal de emprego (ERTE)”, asegurou José Tomé, quen engadiu que esta solución “responde o compromiso social” do seu goberno.

Deste xeito, a Deputación manterá “nas mesmas condicións de facturación” estes contratos relativos á prestación de servizos en centros de atención de maiores, en vixilancia de dependencias policiais, en teleasistencia e en limpeza de edificios provinciais, entre outros.

Esta e outras medidas dos últimos días, reivindica o presidente, son “unha aposta decidida por manter o emprego, inxectar liquidez e asegurar a calidade dos servizos destas empresas que teñen contratos coa Deputación de Lugo”.