O proxecto de ampliación lateral da estrada LU-231, entre Friol e Palas, contempla a eliminación de ringleiras de árbores autóctonas que habitan ás beiras da vía. Tamén os muros construídos a xeito tradicional desaparecerán da zona. O colectivo Asociación para a Defensa do Patrimonio Cultural Galego (Apatrigal) xa denunciou isto en diversas ocasións e agora pon no foco o inicio das obras, contrarias a un informe técnico que alertaba dun aumento na sinistralidade.

En sinal de protesta, convocaran a veciñanza para unha ruta en coche o vindeiro 7 de marzo, ás 11 da mañá. “Compartiremos esta fermosa viaxe antes de que corten centos de árbores e antes de que as escavadores acaben cos muros de pedra ‘a xunta seca’. Mostraremos que o patrimonio importa!”, dicían. Agora temen que esas árbores non se manteñan nin sequera ata o sábado.