A asociación animalista Libera denunciou este domingo que lle fenderon as rodas dianteiras do coche a unha activista ao protestar contra unha cazaría de raposos que comezou en Portomarín e anunciou que trasladará a incidencia ao Congreso, “denunciando a pasividade das autoridades”.
Segundo sinalou este domingo a organización nun comunicado, teñen a intención de impulsar unha “batería de preguntas” ao Goberno a través do deputado de Esquerra Republicana de Cataluña (ERC), Joan Josep Nuet, sobre o dispositivo da Garda Civil asignado e as súas ordes.
Así, os animalistas subliñaron que este dispositivo realizou rexistros sobre vehículos de activistas, pero que “non hai constancia de que fixesen o mesmo” cos coches ou remolques dos participantes, as súas licenzas, armas ou o estado dos carnés.
A Asociación indicou que Joan Josep Nuet tamén falará de que o ataque ao coche dos animalistas “foi saboteado”, pois a identificación do autor “sería moi sinxela”. Así, o deputado preguntarase se “esta acción contra unha propiedade privada tamén se enclava na actividade deportiva” dos cazadores.
Ademais, a organización mostrou a súa “fartura” polas “terxiversacións e mentiras” lanzadas polo “lobby procaza”, como afirmar que “protestar está prohibido” e recalcou que as protestas foron realizadas “de forma pacífica, segura e ao amparo da Constitución”.
A asociación animalista Libera trasladou que rexistrará unha queixa ao Consello Superior de Deportes, pois se a caza de raposos “é un deporte recoñecido como tal na normativa, debería estar supeditado ás leis e regulamentos que se aplican ao deportista federado: a xustiza deportiva e posibles sancións por incitación á violencia”.
