Co San Valentín (ou Día dos Namorados) a piques de chegar, cómpre aguzar a mirada e observar con ollos críticos todo o que rodea esta data. Rachar cos mitos sobre o amor romántico; esgazar coa idea de que amar doe: “Se o amor aperta…, non é da túa talla!”
Ese é o lema escollido pola área de Igualdade, Muller e Xuventude do Concello de Lugo para preparar unha xincana o vindeiro venres, 14 de febreiro, no casco histórico da cidade. Trátase dunha proba de estratexia e habilidade, dirixida a mozas e mozos para desenmascarar os tópicos que xorden arredor das relacións sentimentais.
Segundo explicou a edil de Igualdade, Ana González Abelleira, esta actividade pretende dar a coñecer “outras alternativas ás historias de amor de conto” e apartar os estereotipos que a sociedade interiorizou de maneira inconsciente ata o punto de que inflúen nas relacións afectivas. Conceptos como o da media laranxa, a predestinación, a paixón eterna ou os celos serán algúns dos mitos a combater durante a xornada.
EN QUE CONSISTE A XINCANA?
No xogo, as persoas participantes irán superando probas e acertixos para “recuperar a identidade perdida por dez personaxes recoñecidas”. En canto atinen as respostas, obterán unha brebaxe para que beban os ‘príncipes’ e ‘princesas’ (monitores disfrazados). Iso permitiralles recobrar a súa lucidez por un minuto, tempo durante o cal as xogadoras poderán facerlles preguntas para tratar de identificar dita personaxe. O equipo gañador será aquel que acerte, no menor tempo posible, o maior número de personaxes e de mitos románticos que agochan.
A xincana, que se celebrará o propio día de San Valentín, comezará ás 18:00 horas na Praza Maior e o prazo de inscrición para anotarse permanecerá aberto ata o día anterior. Para apuntarse, de xeito gratuíto, só é preciso poñerse en contacto coa Casa da Xuventude.
