Axentes da Policía Nacional detiveron un mozo lucense de 20 anos despois de que lle roubara a un menor. O suceso producíase unhas semanas máis tarde de saír de prisión por asaltar persoas maiores e outros menores.
Segundo informou a Policía Nacional, os feitos que levaron á detención este mércores do mozo sucederon entre o 26 de xaneiro e 1 de febreiro. Daquela, un menor presentouse nas oficinas policiais, acompañado dos seus proxenitores, para denunciar un roubo. O rapaz relatara que un “home cunhas características moi concretas, como que coxea”, abordouno pola rúa. A punta de navalla, pedíralle o diñeiro que levaba. Ante iso, o mozo entregoulle cinco euros e conseguiu marchar do lugar.
Días máis tarde e na mesma zona, o denunciante é chamado polo agora detido desde certa distancia, polo que lle deu tempo a ausentarse do lugar.
REINCIDENTE
Con iso, iniciouse a investigación para a localización deste “perigoso delincuente“, tal como o describiron fontes da Policía. Aseguraron que este mozo xa estivera arrestado por feitos similares. En concreto, por roubo con violencia sobre dúas persoas de idade avanzada, ás que lles chegou a causar lesións, ou por roubos con violencia e intimidación a menores de idade.
