Unha persoa foi evacuada este mércores nun helicóptero medicalizado tras saír da vía co vehículo no que circulaba na Fonsagrada. O coche chocou contra unha árbore.
Segundo informou o 112 Galicia, o accidente tivo lugar sobre as 11:30 horas deste mércores. Unha persoa particular informou da saída de vía dun vehículo que circulaba pola LU- P-4606, á altura do punto quilométrico 27, ao seu paso pola parroquia de Carballido.
Os xestores do 112 Galicia puxeron os feitos en coñecemento dos profesionais sanitarios do 061, da Garda Civil de Tráfico e da Policía local, ademais dos membros de Protección Civil da localidade. O equipo de Urxencias Sanitarias de Galicia-061 enviou ata o punto un helicóptero medicalizado, así como unha ambulancia e un equipo sanitario de Atención Primaria.
Fontes do 061 confirmaron a Europa Press que finalmente foi o helicóptero medicalizado o que evacuou a persoa ferida ata o Hospital Universitario Lucus Augusti (HULA).
